Impaganetget ni Atty. Lauro Gacayan, maysa nga abogado iti Baguio City, nga uray pay no naibaga ni President Ferdinand Marcos Jr. iti SONA ti panggepna a mangikkat iti system loss ken system loss Value Added Tax, patienna a saan a dagus a maipatungpal daytoy gapu ta masapul pay nga aglabas iti proseso ti panagaramid iti linteg.
Iti pannakiuman ti Bombo Radyo kenni Atty. Gacayan, kinunana a kasapulan pay ti proseso iti Kongreso ken Senado sakbay a maipatupad ti aniaman a panagbalbaliw iti panagbayad dagiti consumers iti system loss ken system loss VAT.
Gapu iti daytoy, insingasingna a masapul a maipasa iti Kongreso ken Senado ti umno a bill para iti nasao a isyu.
Innayonna metlaeng a mabalin a mapapartak ti proseso no i-certify ti presidente a kas urgent bill ti proposal a mangirugi iti panangikkat ti system loss ken system loss VAT iti bayadan dagiti konsyumer.
Kinuna ti abogado, “kung gusto niya, magsabi lang siya… and he will certify that this is urgent, then the Congress shall give priority at uunahin ito compared to other pending bills.”
Mainaig iti dayta, impaganetget ni Gacayan a napateg ti panangipatungpal ti umno a proseso iti panagbalbaliw ti bill tapno saan laeng a maibaga iti SONA no di ket maipaay iti aktwal a tulong kadagiti consumers a mangsango iti nangato a gastos iti kuryente. //Bombo Khey Reparip
