Manamnama a palpasenen ti House prosecution ita a lawas ti panangilatag kadagiti ebidensya kontra kenni VP Sara Duterte sakbay nga ipresenta ti depensa ti bennegda iti senate impeachment court.
Sigun kenni lead prosecutor Atty. Gerville Luistro, ti financial expert a ni Atty. Alexander Cabrera ti maudi a testigo ti prosekusyon seknan kadagiti alegasyon ti saan a mailawlawag a kinabaknang.
Maipalagip nga imbutaktak ni Cabrera a dumanon iti agarup P817.87 Million ti mapapari a saan a naideklara a kinabaknang ken kita da VP Sara ken ti asawa daytoy ni Atty. Mans Carpio manipud 2022 agingga 2025.
Karaman kadagiti natingiting a rekord ket dagiti bangko, tax returns, SALN ken dokumento dagiti kompanya a maikonkonekta ita kadakuada.
Agtuloy met ti panagdengngeg inton bigat para iti cross examination ti depensa kenni Cabrera kasta metten ti panangdamag dagiti senator-judges.
Nakumpleton ti prosekusyon ti panangilatag iti ebidensya iti Articles I ken 4 seknan iti maatap a saan nga umno a panangaramat iti confidential funds ken grave threat.
Inbabawi da metten ti Article III wenno ti maipapan iti maatap a bribery.
