BAGUIO CITY – Inaprobaran ni Governor Crescencio Pacalso ti resolusyon ti provincial board a mangkidkiddaw iti panangbukelna iti independent task force a mangimbestigar iti maatap a ‘payola’ manipud kadagiti chicken dung dealers sadiay munisipyo ti Tublay.
Nailanad iti resolusyon nga adda ti alegasyon a sumagmamano a paset ti makolkolektar a parking fees kadagiti chicken dung dealers ti maiwarwaras iti sumagmamano nga opisyales ti provincial government ken kasapulan a maimbestigaran ti nasao nga alegasyon tapnu maamuan ti kinapudno.
Gapu iti daytoy, sinuratan ti gobernador ti National Bureau of Investigation (NBI)-Cordillera acting regional director Atty. Sixto Burgos Jr. para iti panakaimbestigar ti maatap a ‘chicken dung’ payola.
Imbilinna met ti naan-anay a kooperasyon dagiti maseknan nga opisina iti imbestigasyon ti NBI tapnu marisuten ti nabayagen nga isyu.
Naisumitir metten iti NBI-Cordillera dagiti kaskenan a dokumento para iti panakaisayangkat ti imbestigasyon.
Nagramot ti isyu iti surat a naawat ti provincial board a nangilanad a sumagmamano a board members ti maipapaayan iti bingay manipud iti parking fee a makolkolektar kadagiti chicken dung vendors iti probinsia.
