Nangrugi itan ti panagimula dagiti Cut Flower growers iti Cordillera patikular idiay La Trinidad, Benguet iti sabsabong para iti masungad nga All Saints Day ken All Souls Day.
Iti panakiuman iti Bombo Radyo kenni Mr. Andy Colte Sr.,maysa kadagiti Siyentistang Magsasaka ng Pilipinas, saan unay a maap-apektaran dagiti flower growers iti Benguet ita a panagtutudo.
Sigun kenni Colte, kabisadon dagiti farmers ti kasapulanda nga aramiden nu maaddaan iti parikut ti produksyonda babaen metlaeng kadagiti seminar nga at-atendaranda ken panangadalda kadagiti maar-aramid a teknolohiya.
Innayon ni Colte a kadagiti laeng plantasyon a silulukat ken saan a naaramatan iti greenhouse iti makapaspasar iti minimal a problema.
Malaksid iti dayta, kinuna ni Colte a ti kadawyan nga imulmula dagiti farmers ket dagiti kabisadodan nga iprodyus nu sadino, kangrunaanda a tumtumbuken dagiti dadakkel nga okasyon kas iti Undas.
Kabayatanna, ibilbilangda met a kangrunaan a karit ti kaadda dagiti illegal importer ken dagiti dadakkel a negosyante a mangipapaay iti kapada a produkto tunggal madanon dagiti maisagsaganaan a pasken.//Bombo Rob Dominguez
