Imbilin ni President Ferdinand Marcos Jr. kadagiti maseknan nga ahensiya ti gobyerno ti dagus a panangsigurado ti seguridad dagiti Pilipino nga adda idiay Middle East kalpasan iti nagsasaruno a panag-atake idiay Iran.
“We have received reports of airstrikes that hit Iran. We are in the process of getting more information,” impablaak ni President Marcos Jr.
“I have instructed the DFA and the DMW to take measures to determine their whereabouts in affected areas and to take immediate measures to ensure their safety,” innayonna iti pablaak daytoy.
Sigun iti Department of Foreign Affairs (DFA), awan pay laeng ti naireport a Pilipino a naapektaran wenno nadangran gapu iti nasao a pasamak.
Maipalagip a nangrugi dagiti serye ti panang-atake kalpasan iti joint missile attack ti America ken Israel idiay Iran no sadino binalsan met ti Tehran.
Iti sabali a bangir, alalukoyen ti diplomatic mission ti Pilipinas idiay United Arab Emirates (UAE) kadagiti Pilipino sadiay nga agbalin dagitoy a kalmado ken urayenda ti kaudian a pakdaar manipud iti gobyerno ti United Arab Emirates ken iti Embahada ti Pilipinas idiay.
Mapapati nga adda ti agarup 30,000 a Pilipino ti adda diay Israel ken agarup 1,000 met ti adda idiay Iran.
Immuna metten a nangiruwar ti pakdaar ti Embahada ti Pilipinas idiay Kuwait kadagiti Pilipino nga agtalinaed da pay laeng kadagiti pagtaenganda ken liklikanda ti mangiwaras iti saan a naberipikar nga impormasyon. //BomboKCS
