Indepensa ti pagilian a France ti desisyon daytoy a palubusan ti eroplano ni Israeli Prime Minister Benjamin Netanyahu a dumalyasat iti airspace daytoy.
Nagturong ni Netanyahu sadiay New York para iti United Nations General Assembly.
Sigun iti French Foreign Ministry, awan ti nilabsing daytoy nga international law agsipudta, saan nga ibilbilin ti Rome Statute ti International Criminal Court (ICC) ti maysa a pagilian nga agtignay kontra iti maysa nga state aircraft a nagluganan ti tao nga addaan iti ICC arrest warrant.
Maipalagip nga impaulog ti ICC ti warrant of arrest kontra kenni Netanyahu mainaig iti alegasyon ti war crimes sadiay Gaza.
Kabayatanna, miembro ti France iti ICC ken obligado daytoy a makitinnulong iti korte, karaman ti pannakaaretar ti wanted suspect a sumrek iti teritoryo daytoy.
Iti baet daytoy, impaganetget ti France a sabali a saritaan no maipapan iti panagtayab iti airspace daytoy.
Maibasar iti Flightradar24, dimmalsayat ti eroplano ni Netanyahu sadiay Greece, Italy ken France sakbay a simmangpet iti Estados Unidos.
