BAGUIO CITY – Impeksa manen dagiti residente iti tallo a barangay sadiay Itogon, Benguet ti panagtubngarda iti plano ti Benguet Corporation a panakaipangato ti tailings dam no. 2 ti kompanya.
Nangisayangkat dagiti nasao a residente iti taripnong a nangipeksaanda iti nasao a panagtubngar kagiddan ti panangisayangkatda iti tradisyonal a ritual iti masakupan ti tailings dam.
Impettengda a makadadael iti aglawlaw ti plano ti kompanya ken napeggad daytoy kadagiti agnanaed kadagiti nababa a paset ti munisipyo, partikular ti pegges ti danum nga agtataud iti pasilidad.
Dinakamatda pay ti saan a panangtungpal ti kompanya kadagiti nabayag a katulagan dagitoy.
Impettengda a saanda a patgan ti plano ken bantayanda ti naso a lugar tapno saan a matuloy ti panggep ti kompanya.
Kabayatanna, impetteng ti Benguet Mining Corporation a nabayagen a nakompletoda dagiti proseo ken papeles a mandato ti linteg seknan iti panakaipangato ti Tailings Dam No. 2 daytoy.
Sigun kenni Engr. Val Bungalos, resident manager ti nasao a kompanya, saandan a naklaat wenno nasdaaw iti panakatubngar ti nasao a plano.
Nupay kasta, impasiguradona a nakasaganada a makipatang kadagiti maseknan nga umili gaputa nasken a maipatungpal ti proyekto.
Maitunos daytoy iti pammilin ti Mines and Geosciences Bureau – Cordillera ti panangipangato ti nasao a kompanya iti dam embankment ti nasao dam.
Mainaig iti dayta, impaulog ni Itogon Mayor Victorio Palangdan ti stoppage order iti panakaipangato ti nasao a dam agingga a saan a nakaala ti kompanya iti kaskenan a dokumento, pakairamanan ti building permit anipud iti lokal a gobyerno ti munisipyo.
Sigun iti kompanya, surutenda ti pammilin ti mayor ngem saan a mangipasimudaag a no saan a maipaay ti nasao a dokumento ket saanda nga ituloy ti proyekto.
Inlawlawagda a sipud naipatakder ti tailings dam idi 1974 ket saanda a nabilin nga agala ti permiso iti munisipyo.
Naamuabn a ti lima metro a panakaingato ti tailings dam no. 2 ket maximum a kangato a maitunos iti permit dagitoy tapno maragpatda ti 775 meters a kangato ti nasao a tailings dam.
