Isaksakad ita ti Department of Agriculture (DA) ti panangipataw ti price cap iti retail dagiti imported a bagas tapno masolusyonan ti isyu ti saan a patas a panagngato ti presyo ti bagas iti merkado.
Sigun kenni Agriculture Secretary Francisco Tiu Laurel Jr., dumanonen iti P55 agingga P58 tunggal kilo ti panangilako dagiti sumagmamano a retailers iti imported a bagas.
Patien ti ahensiya nga araramaten dagiti dadduma a negosyante ti panagngato ti presyo ti produkto a petrolyo ken krisis idiay Middle East tapno mangipangato dagitoy ti presyo.
Impetteng met ti nasao nga opisyal a saan a dumanon iti nadakamat a presyo ti panangilako kadagiti bagas gapu ta saan paylaeng a ngimmato ti gastos ti panag-angkat kadagiti bagas.
Kas solusyon, impakaammo ti nasao nga ahensya nga agisumitir dagitoy iti rekomendasyon idiay Malacanang para iti implementasyon ti rice cap.
Inlawlawagda a saan ditoy a karaman dagiti lokal a produkto a bagas. //BomboKCS
