Impasigurado iti lokal a gobierno iti siudad ti Baguio nga agtultuloy ti panangipatungpal iti Emergency Transport Subsidy Program (ETSP) para iti agtultuloy a transportation services para iti publiko.
Iti sidong iti programa, baybayadan iti LGU ti “backloads” o return trips manipod kadagiti sumagmamano a barangay uray awan ti kargada a pasahero iti jeep. Daytoy ket tapno masigurado nga adda dagiti agbibiahe latta a jeep manipod alas-6 ti malem agingga alas-11 iti rabii.
Dumanon iti 295 a jeepney manipod iti 49 a transport cooperative nga agdaldalyasat iti 32 a ruta ti karaman iti Emergency Transport Subsidy Program.
Sigun kenni Mayor Benjamin Magalong, maituloy latta ti programa gapu iti nangato paylaeng a presio iti lana.
Naaddaan iti rollback iti presio iti lana ita a lawas ngem sigun kenni Mayor Magalong, saan pay daytoy nga umdas.
Patien ti opisial a napateg a mabalanse ti pagimbagan dagiti komyuter ken iti transport sector tapno maipasigurado nga agtaltalinaed a kabaelan ti plete bayat nga agtitinnulong metlaeng a makabangon dagiti tsuper manipod iti epekto iti nangato a presio iti lana.
