Impeksa ni Eugene Espiritu, Assistant School Head ti Benguet National High School a maadadal ti posibilidad ti mamindua a daras a pannakaipatungpal ti School Safety Drill para iti active attack incidents agingga mapagbalin a quarterly kas iti maipatpatungpal a quarterly National Earthquake Drill.
Sigun kenkuana, ti nasao nga aktibidad ket tapno maisagana dagiti estudyane kasta metlaeng ti pagadalan iti kanito nga ada ti mapasamak nga insidente iti uneg ti pagadalan.
Innayon pay daytoy a napintas metlaeng nu agbalin a quarterly ti nasao a drill tapno maitatak daytoy iti ‘muscle memory’ dagiti estudyante.
Nupay kasta, maadadal pay laeng nu anya dagiti sumaruno nga addang dagitoy ken maipatungpal metlaeng ti meeting kadua dagiti dadduma a maseknan nga ahensya tapno mapagtatalantanan ti nasao nga isyu.
Kabayatanna, maysa kadagiti nagbalin a komeno iti naipatungpal nga school safety drill ti panangbigbig dagiti suspek wenno description daytoy tapno apaman nga agresponde dagiti kameng ti kapulisan, nalakada a maibigbig ken makemmeg ti suspek.
Inlawlawag met daytoy nga iti agdama, adda ti nasayaat nga alarm system a mangeg iti entiro a campus ngem daytoy ket pang-earthquake drill laeng. Nupay kasta, maururay laengen ti standard a safety alarm nga iyulog ti national para iti safety alarm.
Kabayatanna, impeksan met ni PLTCOL Zacharias Caloy Dausen a rumbeng a maipatungpal metlaeng daytoy kadagiti dadduma pay a pagadalan.
Ti nasao nga aktibidad ket dakkel a tulong tapno maisuro dagiti estudyante kangrunaan dagiti school staffs nangnangruna ta dagitoy ti agserserbi kas responsers iti kanito nga adda dagiti mapasamak nga insidente.
Innayon pay daytoy a nasken metlaeng nga maiyemplementar ti strikto a polisiya iti pagadalan kas iti panangaramat iti ID ken panangcheck kadagiti bags dagitoy sakbay nga umuneg iti pagadalan ken dadduma pay nga addang.
Impetteng pay daytoy a ti napateg ita ket ti pamay-an a maliklikan dagiti insidente kas iti pananginstall kadagiti CCTV, panangi-enforce kadagiti alad ken dadduma pay.
Dinar-ayan ken nakipaset met ditoy dagiti learners ken school staffs ti Benguet National High School, representative manipud DepEd Benguet, kapulisan, NAPOLCOM, DILG, LGU, MDRRMO ken daduma pay.
Immuna metten nga inlawlawag dagitoy a sakbay a naipatungpal ti safety drill, adda dagiti waiver a naipaay ken adda ti series of practice nga impatungpalda.//via Bombo Noveh Organo
