Imbinglay ni Mr. Ray Marty Gattud, Election Officer idiay Mankayan, Benguet ti nagbalin a taray ti voting registration idiay Mankayan, Benguet iti napalabas nga innem a bulan a panangparehistroda kadagiti botante iti nasao a munisipyo.
Iti pannakiuman ti Bombo Radyo kenkuana, dinakamatna a dumanonen iti 21, 207 ti botante idiay Mankayan no sadino 553 iti nasao a bilang ti naparehistro manipud iti bulan ti Abril agingga Mayo 18 iti agdama a tawen.
Sigun kenkuana, binmaba ti bilang dagiti nagrehistro nga agbotos idiay Mankayan, Benguet.
Nupay kasta, iti nasao a bilang, patien ni Gattud a dakkel a banag ti panangipatungpalda iti offsite registration wenno panagbisitada kadagiti babbarangay ken pagadalan tapno maparehistro dagiti residente sadiay.
Insalaysay gamin daytoy a nu idiay opisinada, manmanu laeng dagiti aldaw nga agdouble digit ti outputda wenno dumanon iti 10 ken nasursurok dagiti mapan agparehistro nu idilig iti bilang a mapaparehistroda kadagiti offsite registration.
Dinakamatna nga iti 21 nga aldaw, dumanon laeng iti agarup 62 ti maparehistroda ngem idi nangipatungpal dagitoy iti satellite registration, nabaelanda a nakapagparehistro iti agarup 413.
Patien ni Gattud a gapu daytoy ta naiyasideg kadagiti luglugarda ti panagparehistro no sadino saandan a kasapulan nga agplete a mapan iti opisina ti COMELEC nangnangruna tatta a ngimmato ti plete. //bombokaren.c.sapirao
