BAGUIO CITY – Kidkiddawen ti dadaulo ti Baguio City Police Office ti panakibinnadang ti publiko tapnu maaksionanda ti maibagbaga a panagraira dagiti grupo a basta lattan mangdangdangran kadagiti uubing a makursunadaan dagitoy.
Iti panakiyuman ti Bombo Radyo kenni PSSupt. Ramil Saculles, kinunana a naidanunen kadakuada ti isyu ti makunkuna a ‘hypebeast’ wenno ‘hypebeks’.
Dinakamatna nga adda idi ti naireport kadakuada nga insidente mainiag iti nasao a grupo, partikular iti paset ti Salud Mitra ngem idi napanda nagbantay ket awan ti nakitada iti naireklamo.
Inaklonna met nga adda ti krimen partikular ti physical injuries nga ar-aramiden dagiti nasao a grupp.
Dapu iti daytoy, umap-apela ni PSSupt. Saculles kadagiti makakitkita kadagiti nasao a grupo tapnu dagus nga ipaka-ammoda iti pulisya, partikular ti lugar ken oras a pakakitkitaan kadagiti ‘hypebeast’ tapnu maaramid ti pulisya ti umno nga aksion wenno panakiballaet.
