BAGUIO CITY – Manamnama a mapunno manen ti amin a hotels, inns, transient houses ken dadduma a balay pagdagasan iti siudad ti Baguio ita a Valentine’s Day.
Gapu iti daytoy, binalakadan ti Department of Health (DOH)-Cordillera ti panangisagana dagiti managers ken agtagikua kadagiti balay-pagdagusan iti umdas a bilang ti condom nga aramaten dagiti agdagus kadakuada.
Kinuna ni DOH-Cordillera Assistant Regional Director Amelita Pangilinan a saanda nga agiwaras iti condom iti Aldaw dagiti Puso gapu iti panagtubngar ti Simbahang Katolika iti nasao a programa.
Paset pay laeng daytoy iti kampania ti DOH-Cordillera kontra iti panagwaras ti HIV-AIDS ken teenage pregnancy.
Maibasar iti report, agtultuloy ti panangato ti bilang dagiti Cordilleran a makapkaptan iti HIV-AIDS.
Maipalagip a nailista iti rehion Cordillera ti kangatuan a bilang ti teenage pregnancy wenno panagsikog dagiti agtutubo iti intero a Pilipinas idi napalabas a tawen.
