BAGUIO CITY – Imbilin manen ti COMELEC-Baguio ti panangiproseso dagiti maseknan a nagpila ti Certificate of Candidacy (COC) kadagiti naduktalan a biddut wenno kurang nga impormasyon iti impila dagitoy a COC.
Sigun kenni City Election Officer Atty. John Paul Martin, impaulogen ti Law Department ti COMELEC ti tentative a listaan dagiti kandidato a saan a simmurot iti format partikular kadagiti impormasyon a maiparang to iti balota.
Kinunana a pinaka-amuandan dagiti maseknan a kandidato ditoy siudad ti Baguio.
Dinakamatna a kasapulan a maipila ti Request for Correction sadiay COMELEC sakbay ti November 8 ti agdama a tawen.
Imbinglay ni Atty. Martin a kadawyan a saan a sinurot dagiti nagpila ti COC ti format ti nagan dagitoy nga agparang to iti balota.
Maibasar iti pagalagadan ti COMELEC, nasken nga umuna ti apelyido, sumaruno ti nagan wenno alyas ti kandidato ken ti politikal party a nakairamanan daytoy.
Inlawlawagna pay a saan pay a daytoy ti pinal a listaan dagiti kandidato agingga iti maudi nga aldaw para iti substitution ken withdrawal dagiti nangipila ti COC para iti 2022 National and Local Elections.
