Agtultuloy ti panagtinnulong iti lokal a gobierno iti siudad ti Baguio, pribado a sektor ken dagiti ahensia iti gobierno tapno isimpa dagiti pagpasyaran ken mangipatungpal iti adu nga aktibidad tapno makaguyugoy iti turista iti siudad.
Sigun kenni Mayor Benjamin Magalong, agtultuloy ti rehabilitasion dagiti parke a kas iti Sunshine Park ken Burnham Lake tapno manayunan ti atraksion iti siudad.
Numan pay ngumatngaton ti bilang dagiti turista, kinuna ni Magalong a nababa paylaeng daytoy gapu iti epekto iti krisis iti lana gapu iti giera idiay Middle East.
Kinunana a manipod iti sigud a 50% a panagbaba iti turista, dumanon iti 35% agingga 40% paylaeng ti panagbaba iti agdama.
Mapapati a dakkel metlaeng ti epekto daytoy iti ekonomia iti siudad, nangruna kadagiti hotel ken lodging house a nababa wenno awan paylaeng iti weekday occupancy.
Kinunana a kadawyan laeng a sumaysayaat ti turismo tunggal weekend.
