BAGUIO CITY – Imbasura ti Benguet Electric Cooperative (BENECO) Board of Directors (BOD) ti panangiyendorso ti National Electrification Administration (NEA) kenni Presidential Communications Operations Office Assistant Secretary Ana Marie Banaag kas general manager ti kooperatiba.
Iti naangay nga special session dagitoy idi kalman, naipatungpal ti panagbobotos ken ditoy a kaaduan kadagiti BOD ti pimmabor kenni officer-in-charge Engr. Melchor Licoben.
Naituding met a mairuar inton Biyernes ti resolusyon iti napagsasaritaan ti BOD ken mailanad ditoy dagiti rason ti panangipettengda a pagtalinaeden ni Licoben iti posisyon.
Kalpasan daytoy ket maiturong iti NEA tapno adalenda ti resolusion ti BENECO-BOD.
No makitada a balido ti rason dagitoy ket aksionanda ti nasao a banag ngem no saan ket posible a mangdutokda ti agtugaw kas General Manager wenno ilukatda manen para iti serye ti aplikasion.
