Impasigurado ti Benguet Electric Cooperative a nakasagana dagitoy iti umadanin a National ken local elections inton Mayo 12, 2025.
Iti panakiuman ti Bombo Radyo kenni Laarni Ilagan, Community Relation Associae-Benguet Electric Cooperative, kinunana nga idi pay napalabas a tawen a nagsagana dagitoy tapno maipasigurado nga awan ti mapasamak a power interruption nangruna iti aldaw ti panagbobotos.
Sigun kenni Laarni, ti preparasyon dagitoy ket “before, during ken after” tapno siento per siento nga adda iti suplay ti kuryente.
Nakared alert metten dagitoy nangrugi idi kalman ken agbayag daytoy agingga inton Mayo 14, 2025 no sadino kayatna a sawen a dagiti personnels ti BENECO ket nakadeploy kadagiti strategic places kasta met a nakasagana iti emergency response plans dagitoy.
Malaksid iti dayta ket nakastandby dagiti staff nga agresponde kadagiti anyaman nga emerhensiya kasta met a dagiti equipments ket nakasagana.
Kinuna ni Laarni nga idi napalabas a bulan ket naipatungpal ti line clearing ken bimmisita dagiti engineers manipud Department of Energy a nangkita kadagiti polling centers.
Kabayatanna, inyunay-unay ni Laarni nga awan ti nasken a pagdanagan ti publiko maipapan iti suplay ti kuryente inton eleksyon gapu ta naipasigurado daytoy.
Mal-allukoy met ti publiko a mabalinda a kontaken ti BENECO kadagiti anyaman a pakaseknanda gapu ta ti consumer welfare office ket 24/7.
