Maidagdagadag iti publiko nga ipangpangrunada a gumatang iti merkado publiko ken liklikanda ti gumatang kadagiti illegal peddlers iti siudad iti Baguio.
Iti interview iti Bombo Radyo kenni Daryll Kim Longid, mangidadaulo iti Public Order and Safety Division kinunana a nasaysayaat a gumatang kadagiti agab-abang iti merkado publiko tapno mabalin nga agreklamo apaman a makagatang kadagiti addaan iti dadael a produkto.
Sigun kenni Longid, naingit a maipawpawil ti illegal peddling iti siudad ti Baguio agsipudta mangitunda daytoy iti pannakasinga iti dalan ken kalsada nangruna ita nga adu dagiti tattao nga agturturong iti siudad.
Innayon pay ti nasao nga opisyal a sumagmamano kadagiti addaan iti pwesto iti merkado ti mangar-aramid iti extension selling no sadino, agturongda met kadagiti sidewalks nga agilako agsipudta awan ti mailakuan dagitoy gapu kadagiti illegal peddlers.
Iti agdama, agkurkurang ti personel ti Public Order and Safety Division iti siudad isu’t gapuna a sumagmamano a paset ti siudad ti addaan latta iti illegal peddlers ngem saan a kas iti sigud nga adu dagitoy.
Nupay kasta, impasigurado ni Longid nga ar-aramidenda ti karbenganda a manglaped kadigiti illegal peddlers iti siudad.//mp4
