Kinidaw ti maysa kadagiti councilors ti Tublay, Benguet ti saan a panangiwaras iti fake news kagidan iti napasamak a landslide a nakairamanan ti rocknet project.
Sigun kenni Lalaine Polig, councilor iti nasao a munisipyo, saan a panawen ita ti panag-rant ken panangiwaras iti saan a pudno a damag nu diket agtitinnulong ketdi kuma ti amin.
Innayon daytoy a sigun iti pannakiumanna kadagiti residente nga asideg iti nasao a pasdek, adda ti naitulongna ti naimuntar a rocknet sadiay. Innayonna pay a nabayagen a naimuntar ti rocknet iti nasao a kalsada.
Kabayatanna, agpalpallagip met daytoy kadagiti motorista a limitado pay laeng ti mabalin a dumalyasat iti rangtay sadiay no sadino 3 tons pay laeng ti mabalin a maipagna sadiay.
Kabayatanna, impeksa met ni Governor Melchor Diclas nga iserserbi met ti rocknet sadiay ti purpose na gapu ta sakbay a makabilan ti rocknet ti nasao a kalsada, agtinnag dagiti bato ken dagdaga sadiay.
Nupay kasta, sigun iti nasao nga opisyal, apaman a narocknetan daytoy, natengngelna met dagiti bato ken daga.
Innayonna pay a nalaklaka a malinisan daytoy gapu ta ingato laeng dagiti aglinis ti nasao a rocknet ngem ita ta medyo dakkel ti napasamak a landslide, medyo marigatanda nga aglinis.
Sigun iti panagadal ti Bombo Newsteam, rumrumuwar a ti nasao a rocknet ket naimuntar idi pay laeng 2016 idi panawen ni sigud a Mayor Ruben Paoad no sadino proyekto daytoy ti Japan International Cooperation Agency (JICA). Nupay kasta, sumagmamano ti mangipekpeksa a naimuntar daytoy 20 a tawenen ti napalabas.
