BAGUIO CITY – Kiniddaw manen ni Contact Tracing Czar ken Baguio City Mayor Benjamin Magalong ti ad-adda a panangpalawa ken panangnayon dagiti dadduma a probinsia iti Cordillera iti COVID-19 testing dagitoy.
Kiniddawna ti nasao a banag kalpasan a nakitana ti nagdumaan ti testing rate ti Baguio City iti COVID-19 no idilig iti testing rate dagiti innem a probinsia ti Cordillera.
Maibasar iti datus ti Regional Epidemiology and Surveillance Unit ti DOH-Cordillera, ti Baguio City nga addaan ti 18.2% a testing percentage ti kangatuan iti entero a rehion a sinaruno ti Benguet iti 10%.
Nupay kasta, nababa ti testing percentage ti dadduma a probinsia kas iti Abra a 2.9%, Apayao a 6.9%, Ifugao a 3.2%, Kalinga a 4.1% ken Mountain Province a 4.2%.
Inyunay-unay ni Mayor Magalong nga awan ti serbi ti nangato a testing rate ti Benguet ken Baguio iti panakapaksiat ti COVID-19 no dagiti dadduma nga umili iti rehion a sumsumrek iti Metro baguio ket saan met a naipasidong iti panagsukimat no positibo wenno saan iti coronavirus.
Innayonna pay a karaman kadagiti nakitana a kangrunaan a rason iti nababa a testing rate dagiti sinarsarungkaranna a probinsia ket ti saan a panakaisayangkat ti COVID-19 testing tapnu saanen nga agparikut dagiti maseknan nga opisyal ken saan a madadael ti karera dagitoy iti pulitika. (report ni Bombo Charles Nikko Limon)
