BAGUIO CITY – Inlawlawag ti gobernador ti Benguet no apay a saan a pinatgan ti National Inter-Agency Task Force (IATF) ti kiddaw wenno apelada a saanen a maipasidong ti probinsya iti Modified Enhanced Community Quarantine (MECQ).
Sigun kenni Governor Melchor Diclas, nagsuratda iti National IATF itay laeng nabiit tapnu saan kuman a maipasidong pay ti Benguet iti MECQ ngem saan daytoy a napatgan.
Kinunana nga iti baet nga inlanadda iti surat a bimmaba ti kaso ti COVID-19 a mailislista ti probinsya, nawayaan dagiti isolation facilities ken dadduma pay ket saan latta a napatgan ti kiddaw.
Inlawlawagna a posible a saan a napatgan ti apelada gaputa nababa latta ti testing capacity ti Benguet, adu dagiti maipaspasidong iti home-isolation ken naobserbaran nga adu kadagiti umili ti saan nga agtungtungpal kadagiti minimum health standards.
Inaklonna a kurang metlaeng ti panagreport ken dokumentasyon nga isumsumitir dagiti munisipyo iti opisinana isut gapuna nga awan met ti maireportna iti National IATF a maysa a nagresulta iti panakaipasidong manen ti Benguet iti MECQ.
Kabayatanna, iti agdama ket bimmaba ti kaso ti Benguet iti COVID-19 gaputa iti innaldaw ket 20 laengen ti mailislista ti probinsia iti nasao a sakit bayat a nawayaanen dagiti isolation facilities.
Nupay kasta, inyunay-unay latta ni Governor Diclas ti panagtungpal dagiti umili ti probinsia kadagiti paglintegan kontra iti COVID-19 kagiddan ti panangipanamnamana nga iyapelada manen iti National IATF ti saanen a panakaipasidong ti Benguet iti MECQ.
