BAGUIO CITY – Guyguyogoyen ti lokal a gobierno ti Baguio City ti La Trinidad, Benguet a mangputarda iti syncronized taxi coding scheme a maiyannatop iti maipatpatungpal iti siudad.
Sigun kenni Councilor Benny Bomogao, dadaulo ti Committee on Public Utilities, Transportation, and Traffic Legislation, makidayalogoda iti nasao a munisipyo tapno kiddawenda ti nasao a banag.
Inlawlawagna a naaramid ti baro a coding scheme kas maiyannatop iti pagkasapulan dagiti umili ita a panawen ti panagtutudo.
Kiniddaw metlaeng ni Councilor Bomogao kadagiti taxi drivers nga ammoenda ti coding scheme tapno saanda a matikitan bayat a maur-uray paylaeng ti desisyon ti lokal a gobyerno ti La Trinidad.
Mainaig iti daytoy, inkalintegan ni PLt. Col. Oliver Panabang, dadaulo ti Traffic Enforcement Unit ti Baguio City Police Office (BCPO) nga inkoordinarda iti La Trinidad LGU ti baro a panagbiahe iti taxi.
Nupay kasta, kinunana nga impatangken ti dadaulo ti Traffic Enforcement Unit ti La Trinidad Municipal Station (LTMPS) sadiay a pagtalinaeden ti regular coding scheme a saan a maipada iti siudad.
Inayonna a natarusanna ti nagbalin a desisyon ti dadaulo ti Traffic Enforcement Unit ti La Trinidad MPS a saanda a mabalin nga ibilin iti La Trinidad nga surotenda ti coding scheme ti Baguio City gaputa adda ti bukkodda a polisiya.
Gapu iti daytoy, kiniddaw ni Panabang kadagiti taxi drivers a saanda nga agreklamo gaputa ti nabukel a baro a wagas ti panagbiahe ket pagsayaatan dagiti commuters ken pagsayaatanda metlaeng.
Kiniddawna pay ti panakitinnulong dagiti drivers tapno masolusyonan ti nasao a pakaseknan.
