BAGUIO CITY- Saan a natuloy ti panangrambak ti Muslim Community ditoy siudad ti Baguio iti panagleppas ti Ramadan sadiay Athletic Bowl idi agsapa.
Iti panakiyuman ti Bombo Radyo kenni Atty. Yaser Guru, dadaulo ti National Commission for Muslim-Filipinos in Baguio City, kinunana a daytoy ket gapu iti saan a nasayaat a sasaaden ti panawen.
Kinunana a naituding kuma a dumar-ay iti selebrasyonda dagiti rinib-ribo a Muslim ditoy siudad.
Innayonna a napateg ti panagleppas ti Ramadan gaputa daytoy ti mangipakita a kabaelan dagiti Muslim a maibturan ti amin nga ipaay ti biag kadakuada gapu kadagiti aktibidadda iti makabulan a holy month.
Sigun kenkuana, inkarkararag dagiti Muslim ti panakabendisyon dagitoy, ti panaka-akseptar ti kararag ken datonda, ti panangpakawan ni Allah kadagitoy ken ti langit ti agbalin a destinayon dagitoy.
Mapattapatta met a sangapulo a ribo ti bilang ita dagiti Muslim nga agnanaed, agnegnegosyo ken agtatrabaho ditoy siudad ti Baguio.
