Naituding a maiyemplementar manen ti panagtiliw dagiti Land Transportation Office ken Baguio City Police Office kadagiti motor nga addaan iti nairarawa a tambutso.
Iti pannakiuman ti Bombo Radyo kenni Robert Macagba, Founding Chairman ti Brotherhood of Riders Advocating, Discipline, Equity and Safety Riding Group, kinunana a maituloy manen daytoy kalpasan a saan a naituloy a naiyemplementar gapu iti kinakurang dagiti alikamen a maaramat.
Sigun kenkuana, napagnunumuan dagitoyen kadakuada dagiti pulis ken dadduma nga otoridad iti siudad a maiyemplementar manen gaputa addan dagiti alikamen a maaramat kas iti decibel meter.
Gapu iti dayta, addaan dagiti naipaay a decibel meter kadagiti amin nga stasyon ti pulisya iti siudad ken panggep pay dagitoy a manayunan tapno adda ti maaramat.
Inyunay-unay met ni Macagba kadagiti kapadana a driver nga itarimaan dagitoyen dagiti motorda sakbay a matiliw dagitoy gaputa iti kanito a matiliw dagitoy ket agbayadda iti P300 agingga P5,000 a multa.
Malaksid iti dayta, makidkiddaw metlaeng ti commitment ken koordinasyon dagitoy kadagiti otoridad.
