BAGUIO CITY – Namingsan manen nga impaganetget ti Abra Provincial Police Office a manageable ken ‘Generally Peaceful’ ti probinsya kagiddan iti umadani nga aldaw ti basingkawel.
Iti interview ti Bombo Radyo Baguio ken Abra PPO Public Information Officer Pol. Maj. Edwin Sergio, addan iti dua nga election related case a nailista dagitoy a nakairamanan ti napasamak a shoot out kadagiti kameng ti PNP ken pwersa ti maysa a kandidato sadiay Pilar, Abra ken iti pammaltog a napasamak iti maysa a kapitan sadiay.
Kinunana a saan a maliklikan a nangitunda daytoy iti panagbuteng iti publiko
Nupay kasta, inpanamnamana nga aramidenda ti mandatuda tapnu mapunas ti panagbuteng dagiti umili nangruna ta maibilbilang a solved case dagiti nasao a kaso.
Dinakamatna a dumanon iti 30 a personel ti Regional Mobile Force Company 15 (RMFB15) iti naideploy sadiay Pilar, Abra ken adda pay dagiti augmentation force manipod iti SAF, Army, ken Abra Provincial Mobile Force Company (PMFC)
Ipaspasiguradona pay iti panangipaayda iti seguridad para kadagiti amin nangruna kadagiti botante
Kabayatanna, kinunana pay a maysa kadagiti ipangpangrunada nga iwanwanawan ita dagiti posible a presensya dagiti Private Armed Groups (PAGs) iti baet ti balligi a profiling ken panangipasurenderda kadagiti nabigbig a pribado a grupo sadiay
Malaksid iti dayta, nainget metlaeng a bambantayanda ti munisipyo a naipasidong iti COMELEC Control; walo a munisipyo a naipasidong iti yellow category, ken dagiti dadduma a munisipyo a naipasidong iti green category.
