BAGUIO CITY – Impeksa dagiti maseknan nga indibidual ti panangtubngarda iti panggep a panakailukat ti kanayunan nga operasyon ti E-bingo iti Baguio City kabayatan ti public hearing a naangay sadiay Baguio Convention Center itay agsapa.
Imbinsabinsa dagiti mangtubtubngar iti daytoy a dakes ti epekto ti nasao nga aktibidad uray no legal daytoy iti sidong ti Philippine Amusement and Gaming Corporation (PAGCOR). innayonda a makadadael daytoy iti pamilya gaputa mabusbos ti kwarta a panggatang koma dagitoy kadagiti pagkasapulan ti pamilyada ken mangitunda daytoy iti panakailumlomda iti utang.
Inlawlawag met ni Mayor Benjamin Magalong a saanna a pinirmaan ti resolusyon nga impasa ti lokal a konseho gaputta kayatna pay a mangngegan ti dasig dagiti nagduduma a sektor.
Immuna iti dayta, nagbobotos dagiti amin a konsehal seknan iti panakaipaay ti “resolution of no objection” a kidkiddawen ti Global Entertainment Incorporated.
Siyam a konsehal ti nangpabor iti panakipaay ti nasao a resolusyon bayat a lima met ti nangtubngar pakairamanan ni Lourdes Betty Tabanda, Philian Louise Weygan-Allan, Mylen Yaranon, Isabelo Cosalan Jr., ken SK Levy Lloyd Orcales.
Iti agdama ket manarimaan paylaeng ti panakaadal ti resolusyon ken manamnama a maipasidong pay iti nagduduma a proseso sakbay a mabukkel ti pina a desisyon.
