BAGUIO CITY – “It’s a dream come true,” ti makuna ni Carlo Von “The Bull” Bumina-ang kalpasan a nabigbig daytoy kas kaunaan a Filipino Mixed Martial Artist a nakaala ti kontrata iti ONE Championship babaen iti ONE Lumpinee.
Iti exclusive interview ti Bombo Radyo kenkuana, nalaos ti ragsakna kalpasan ti panagballigina iti kaleppas a laban daytoy kontra kenni Chayan Oorzhak iti ONE Friday Fights 65 iti Lumpinee Stadium sadiay Bangkok, Thailand idi Mayo 31.
Nabigbig pay ni Bumina-ang kas maysa kadagiti ONE Championship Main Roster nu sadino naipaayan daytoy ti kontrata a $100-K ken performance bonus a $10-K.
Innayona nga amin a parabor a maaw-awatna ket dakkel a panagyaman daytoy iti Namarsua a kanayon a mangtartarabay kenkuana.
Kinunana pay a nasken a saysayaatenna ti performance-na gapu ta karamanen daytoy iti elite club.
Kabayatanna, kinuna ni Bumina-ang kadagiti mangpangpanggep a sumrek iti Mixed Martial Arts (MMA) a kasapulan ti panagregget nga agensayo ken ti panangtagiragsak nu sadino nasken nga agbalin a natibker kadagiti amin a bambanag.
Iti agdama, imet ni Bumina-ang ti rekord nga innem a pangabak ken awan pay ti abak daytoy.//Bombo Mera Pacpacan
