BAGUIO CITY – Iyap-apela ita ti pulisya ti panangliklik dagiti motorista iti Kenon Road.
Kasaruno daytoy ti panagreggaay ti daga ken bato kadagiti paset ti nasao a kalsada gapu iti panagtudona tunggal malem.
Sigun iti pulisya, idi laeng kalman ket natupakan iti bato manipud iti ngato a paset ti bantay ti maysa nga SUV a dimmalyasat iti nasao a kalsada partikular sadiay Camp 3.
Naamuan a paturong kuma iti siudad ti Baguio ti SUV nga imanmaneho ni Eugene Gapuz, 42-anyos ken residente ti Imelda Village, Brookside, Baguio City idi killaat a natnag ti dakkel a bato manipud iti ngato ti bantay a timmama iti windshield ti lugan.
Nangitunda daytoy iti panakadadael ti windshield iti passenger side.
Immuna metten a nagballaag ti Department of Public Works and Highways kadagiti motorista a liklikanda nga aramaten ti Kennon Road ken dumalyasatda iti Marcos Highway wenno iti Quirino Highway.
