Impetteng ti Malacanang a dimmalan iti legal a proseso ti pannaka-arestar ken pannakai-transfer kenni sigud a president Rodrigo Duterte idiay The Hague, Netherlands.
Daytoy ket kalpasan a dinakamat ni sigud a presidente iti suratna iti International Criminal Court idi kanikadua a “kidnapping” ti napasamak idi nai-transfer daytoy idiay Netherlands.
Sigun met kenni Palace Press Officer Claire Castro, ti pannakai-transfer ni sigud a President Duterte sadiay ket dimmalan iti legal a proseso ken mailinya unay iti linteg.
Inlawlawagna a sigun iti Republic Act (RA) 9851, Section 17, a nu ti maysa a reklamo ket naiyuman iti international court, mabalin a palubosan ti gobyerno a maisayangkat ti imbestigasyon iti nasao nga international court.
Innayona a ti nagbalin nga aksyon ti gobyerno ti Pilipinas ket tapno magun-od dagiti complainants ti kidkiddawenda a hustisya.
Maipalagip a nangipila ti waiver ni sigud a president Rodrigo Duterte iti saanna a panang-atendar iti confirmation of charges hearing daytoy a mangrugi inton Pebrero 23 ita a tawen gapu iti edad daytoy ken kondisyon ti salun-at na. //Bombo KCS
