Panggep ita ti Department of Education ken Department of Information and Communications Technology nga agtinnulong tapno maipatungpal ti pannakaadda ti internet connection iti amin a parapubliko a pagadalan iti pagilian.
Kinunada a kayatda a maragpat daytoy sakbay nga agpatingga ti agdama a tawen, isut rason nga agdardaras ken ar-aramidenda ti amin a kabaelanda tapno maragpat ti ‘full internet connectivity’ kadagiti public schools iti Pilipinas.
Patien ti Department of Education iti koordinasion ti Department of Information and Communications Technology (DICT) a posible daytoy nangruna ta pormal a nairugi ti Phases 2 ken 3 ti National Fiber Backbone itay nabiit nga indauluan ni President Ferdinand ‘Bongbong’ Marcos Jr.
Ti pannakapalawa ti programa ti gobierno a National Fiber Backbone ket karaman ti pannakainayon ti 31 a baro a connection points iti Luzon, Visayas, ken Mindanao tapno mapasayaat ti bandwidth ken digital access kadagiti probinsia, opisina ti gobierno, ken public schools kadagiti geographically isolated and disadvantaged areas (GIDAs).
Daytoy nga inisiatibo ket agnumar ti nasurok 600 government sites ken 17 milion a Pilipino.
