Indepensa ti Bureau of Fire Protection (BFP) ti pannakaraamat dagiti babassit a fire trikes wenno three-wheeled motorized firefighting vehicles.
Sigun iti ahensiya, makatulong daytoy iti panagresponde dagiti bombero nangruna kadagiti akikid a kalsada ken lugar a saan a madanun ti regular a fire trucks.
Inlawlawag daytoy ni BFP Officer-in-Charge FCSupt. Wilberto Rico Neil Kwan Tiu, kasaruno ti pannakaiwaras dagiti ladawan dagiti fire trike iti social media a nangitunda iti panangkuestion ti publiko seknan iti kabaelanda a manglapped iti uram.
Sigun kenni Kwan Tiu, inisiyatiba daytoy ti local government units (LGUs) a nairanta a mangpaadu iti assets dagiti fire stations, partikular dagiti awanan iti umdas a fire trucks.
Innayona a dagiti babassit a fire trikes ket naidisenyo a sumrek kadagiti akikid nga eskinita ken kalsada a narigat a serken dagiti regular a fire truck.
Indagadag ni Kwan Tiu iti publiko a saan a tagibassiten dagiti nasao a lugan gapu iti kinabassit ken limitado a kapasidad ti launen daytoy a danum.
Impaganetgetna a ti kinaepektibo ti panagresponde iti uram ket nakadepende metlaeng no kasano kapartak a makadanon dagiti bombero iti lokasyon ti uram.
Kabayatanna, immuna nga inlawlawag ni Interior and Local Government Secretary Jonvic Remulla a dagiti babassit a fire trike nga agwarwaras iti online ket saan a dagiti fire truck a gatangen ti departamento iti P10 million ti tunggal maysa.
