Kidkiddawen manen ti House panel iti Philippine Statistics Authority tapno beripikaren dagitoy dagiti pakabigbigan dagiti 1992 nga indibidual a naakaawat iti confidential fund manipud iti opisina ni Vice President Sara Duterte manipud iti Disyembre 2022 agingga Setyembre idi napalabas a tawen.
Gapu iti dayta,nangipatulod ni House good government and public accountability panel chairperson and Manila Rep. Joel Chua iti surat a mangkidkiddaw iti pannakaberipikar iti Civil Registry Documents dagitoy kas ti birth, marriage ken death certificate dagitoy.
Dagiti nadakamat nga indibidual ket dagitoy ti nangpirma kadagiti acknowledgement receipts nga insumitir ti opisina ti bise presidente iti Commission on Audit (COA) tapno maliquidate ti confidential funds.
Ti kiddaw dagitoy ket kasaruno metlaeng ti pannakatakuat dagiti sumagmamano nga indibidual a nangpirma iti acknowledgement receipts nga awanana iti aniaman a rekord iti Philippine Statistics Authority.
