Nagedwa ti kapanunutan dagiti Senador seknan iti maisaksakad a maipababa ti minimum age ti criminal responsibility iti 10 years old para kadagiti ubbing a nakaaramid iti nakaam-amak a krimen.
Impila ni Senador Robin Padilla ti Senate Bill 372 tapno mabaliwan ti Republic Act No. 9344 wenno The Juvenile Justice and Welfare Act of 2006.
Karaman kadagiti nakaam-amak a krimen ket ti parricide; pammapatay; panangpapatay iti maladaga; kidnapping ken serious illegal detention no sadino, napapatay wenno marames ti biktima; robbery with homicide wenno rape; destructive arson; panangrames; carnapping no sadino,mapapatay wenno narames ti agtagikua iti lugan; ken panaglabsing iti Comprehensive Dangerous Drugs Act of 2002.
Amin dagitoy ket addaan iti dusa a nasurok 12 a tawen a pannakaibalud.
Sigun kenni Sen. Padilla, namnamaenna a nagduduma ti reaksion iti isingsingasingna ngem patienna a panawen tapno maadal manen ti RA 9344.
Nupay kasta, inyunay-unay ni Senator Francis “Kiko” Pangilinan a saan a ti pannakaamyendar iti Republic Act No. 9344 ti solusion, no diket ti umno nga implementasion daytoy.
Iti sabali a bangir, supsuportaran n Sen. Raffy Tulfo ti singasing ni Sen. Padilla no sadino, kinunana a sumagmamano a kaso a maaw-awatna iti radio program daytoy a makaar-aramid iti krimen ket pakairamanan dagiti sumagmamano a minor de edad.
Kabayatanna, impeksa ni Senator Sherwin Gatchalian ti suportana iti linteg a mangsalaknib kadagiti ubbing babaen ti panangipamaysa iti rehabilitation ken reintegration.
Impaganetgetna a ti panangreporma iti ugali ti ubing ket kasapulan ti panawen, anus, ken pannakaawat, ngem rumbeng met a maipaay kadakuada ti umdas a suporta para kadagiti prevention programs.
