Tinagiragsak ni Benguet Congressman Eric Go Yap ti pannakairugi ti konstruksyon ti Benguet Convention Center a maipasdek idiay Wangal Sports Complex, La Trinidad, Benguet.
Sigun kenkuana, nabayagnan a tarigagay ti pannakaibangon ti nasao a pasilidad nu sadino pinondoan ti opisinana ti phase 1 a dumanon iti P150M para ita a tawen 2024.
Kinunana a manayunan pay ti P150M intun sumaruno a tawen para iti phase 2 ken ikagumaanna nga agbirok pay ti kanayunan a pundo kadagiti sumaruno a tawen agingga a maileppas ti nasao a proyekto.
Ti Benguet Convention Center ket addaan iti 3,300 square meters a buklen ti tallo a kadsaaran a steel structure nga addaan ti glass finish.
Ti ground floor ket kabaelanna a mang-akomodar iti 1,000 nga indibidual para kadagiti dadakkel a pasken ken conventions.
Ti pasdek ket addaan ti bukodna nga administration office, receiving area ken fully equipped a kusina.
Tapno madanon ti dadduma a kadsaaran ket makabilan iti tallo nga elevators malaksid pay iti grand staircase.
Iti second floor, ditoy a maimatangan ti banquet hall a kabaelanna a mang-akomodar iti 700 nga indibidual para iti performances, presentations ken speeches.
Makabelan metlaeng iti dua a locker rooms para kadagiti performers, speakers ken staff.
Naidumduma ti maipasdek a Mezzanine gapu iti elevated ken panoramic view ti second floor.
Ditoy metlaeng a maimatangan ken marikna dagiti Persons With Disability-friendly ken gender-neutral comfort rooms.
Karaman a dimmaray iti ground breaking da Benguet Gov Melchor Diclas, La Trinidad Mayor Romeo Salda, Engineer Isagani Cayme ken Edgardo Enriquez ti DPWH Benguet 1st District Office.//Jordan Tablac
