BAGUIO CITY – Impeksa dagiti drivers ken operators ti parapubliko a lugan ditoy lokalidad ti pakadismayada iti saan a panakairaman ti Cordillera kadagiti naipaayan ti ayuda ken subsidiya ti gobierno.
Iti panakiyuman ti Bombo Radyo Baguio kenni Pat Evangelista, presidente ti Jeepney Operators and Drivers Association iti Baguio-Benguet, kinunana a dagiti laeng transport group sadiay Metro Manila, Region 3 ken Region 4 ti nakaawat iti tulong pinansial manipud iti nasional a gobyerno.
Inaklonna a nadismaya dagitoy gaputa mailaklaksid dagiti drivers ken operators ditoy rehion kadagiti ayuda ken subsidiya nga inkari ti nasional a gobyerno.
Impettegna nga idi metlaeng napan a tawen ket saan a nairaman ti rehion iti piso a panagngato ti plete kadagiti parapubliko a lugan.
Nupay kasta, mangnamnama latta dagitoy a babaen iti apela ken petisyon ti transport group iti gobyerno ket maipaayanda iti kaskenan a tulong agsipud ta maysa dagitoy kadagiti nnaapektaran iti COVID-19 pandemic.
