Nagduduma ti reaksiyon dagiti umili maipanggep iti Comprehensive Sexuality Education nga i-implementar ti Department of Education kadagiti pampribado ken pampubliko a pagadalan iti pagilian a Pilipinas.
Sigun iti Department of Education, ti pannakaipatungpal ti Comprehensive Sexuality Education ket makatulong a mangitandudo iti nasayaat a panagdesision dagiti estudyante, manglapped kadagiti nasapa a panagsikog, ken mangkissay kadagiti sexually transmitted infection kadagiti agtutubo.
Iti pannakiuman ti Bombo Radyo kada Lourdes Kilongan Luciano ken Israel Lay-ocan, residente iti munisipyo ti La Trinidad, umanamong dagitoy iti implementasyon ti nasao a programa gapu ta babaen iti daytoy ket mabawasan ti bilang ti teenage pregnancy iti pagilian.
Sigun kenni Lourdes Luciano, saan daytoy a marigatan a makikomunikar kadagiti annakna maipapan iti pannakirelasionda iti opposite sex.
Gapu iti dayta, daytoy ti wagas tapnu maipaayan iti umno nga impormasyon dagiti annakna maipapan kadagiti pagimbagan ken pagdaksan ti iseserrek iti romantiko a relasion.
Sigun met kenni Israel Lay-ocan, nasayaat daytoy a programa ti Department of Education gapu ta mangnamnama daytoy a babaen iti nasao a programa ket maiyunay-unay kadagiti ubbing wenno estudyante ti epekto ti nasapa a panangbukel iti pamilya.
Nupay kasta, nakaawat ti Department of Education iti sumagmamano a batikos manipud kadagiti nagduduma a sektor a pakairamanan ti religious groups, parents’ associations, ken conservative organizations gapu iti nasao a programa.
Ngem impaganetget ti nasao nga ahensya nga agtalinaed a nakakomit dagitoy iti panangipangpangruna iti salun-at ken pagimbagan dagiti agtutubo a Pilipino.//Bombo Genzel Depayso
