BAGUIO CITY – Maisaksakad ti pannakaamyendar ti Ordinance No. 1 (Series of 1990) iti siudad ti Baguio.
Iti pannakiuman ti Bombo Radyo kenni Councilor Elmer Datuin, isaksakadda ti pannakaingato ti minimum legal drinking ken purchasing age iti 21 manipud iti 18.
Inlawlawag ti konsehal a maibasar iti scientific study ti World health organization (WHO), manarimaan ti development ti panagpanpannut dagiti ubbing nga agtawen iti 25.
Daytoy ti maysa a rason iti panggepda a pannakaamyendar ti nasao nga ordinansa.
Innayon ti opisial a babaen iti nasao nga addang, matulungan dagiti ubbing a mailiklik kadagiti saan a nasayaat a direksion a kas iti panagginum ti arak.
Iti kanito a balligi a maamyendaran ti nasao nga ordinansa, mamulta dagiti business stablishments nga agidasar iti arak kadagiti agtawen ti 21 agpababa.
Maipaayan dagitoy iti first offence, second offence ken agingga a makanselar ti business permit dagitoy.
Sigun pay kenni Councilor Datuin, ti siudad ti Baguio ti kaunaan a lugar iti Pilipinas a nangipatungpal iti daytoy no maaprobaran.
Manamnama a maaddaan iti massive information campaign iti las-ud ti innem a bulan tapno mapakaamuan dagiti amin nga agilaklako ti arak.
Isaksakad metlaeng ti konsehal a manayunan ti signages dagiti establisimento a nangidiaydiaya ti arak; pannakaiparit ti arak kadagiti masikog a babae; ken ti pannakaripaso ti distansiya dagiti business establishments a mangilalako ti arak kadagiti simbaan ken pagadalan.//mp4
