“It happens in the timing of God”
Dr. Felipe Comila, President of Benguet State University
Nakapatauden ti Benguet State University idiay La Trinidad, Benguet iti uppat a Summa Cum Laude kalpasan ti sangagasut ket walo a tawen.
Iti interview ti Bombo Radyo, kinuna ni Dr. Felipe Comila, presidente ti nasao nga unibersidad, nairekordda ti kaunaan a summa cum laude idi napan a tawen.
Daytoy ket babaen kenni Vjnhyl Zam Alvendia Pondivida manipud Pangasinan a nagala iti kurso a Bachelor of Science in Development Communication.
Nanayonan daytoy a bilang kalpasan a nagturpos metlaeng kas Summa Cum Laude dagiti tallo nga estudyante ti Benguet State University idi laeng napan a bulan.
Dagitoy ket da Crael B. Lawa, Bachelor of Science in Development Communication; Via Geanne C. Nerona, Bachelor of Secondary Education; ken Patricia Mae D. Morales, College of Public Administration and Governance.
Inlawlawag ni Dr. Comila a maysa kadagiti kangrunaan a basaran iti panangipaayda iti latin honor ket ti nangato a grado.
Agbalin laeng a Summa Cum Laude ti maysa nga estudyante nu addaan daytoy iti 1 agingga 1.24 average, magna cum laude ket 1.25 agingga 1.49 average bayat a ti cum laude ket 1.50 agingga 1.75 average.
Inaklon met ni Comila a saanda a ninamnama a kalpasan ti ado a tawen ket makapataud ti Benguet State University iti Summa Cum Laude rason nga awan pay ti naisagana a pundo para kadakuada.
Nupay kasta, impasigurado ti nasao nga opisyal nga adda ti maipaay a cash incentives kadagiti sumarsaruno nga school year.
Dinakamatna nga adda ti dua a milyon a pesos a nailatang kadagiti achievers ken honor students partikular dagiti magna cum laude ken cum laude.
Iti agdama, nasurok 16,000 nga estudyante ti kabaelan nga awaten ti nasao nga unibersidad.
Manipud iti 11,000 a fresh graduates ti senior high school a nagaplikar ket 4,000 laeng ti inakomodarda para iti school year 2024-2025.//Rose
