Imbilin ti House of Representatives ita nga aldaw ti pannakairuar ni Undersecretary Zuleika Lopez ti Office of the Vice President.
Ti “release order” ket pinirmaan ni Manila Representative Joel Chua ken chairperson ti House Committee on Good Government and Public Accountability.
Mabasa iti surat a mabalin a dagos a wayawayaan ni Atty. Zuleika T. Lopez kalpasan a naisayangkat ti medical examination kenkuana.
Ni Lopez ket naospital iti Veterans Memorial Medical Center sipud idi Nobiembre 23 kalpasan a nagsakit kasaruno ti desision dagiti mammanday linteg a maikkat daytoy iti House detention facility ken maiyakar iti Correctional Institution for Women Correctional Institution for Women iti tengga ti rabii.
Agpatingga koma ti pannakaibalud ni Lopez inton Nobiembre 25, ngem pinaatiddog ti Kamara agingga iti Nobiembre 30.
Naibilin a maibalud ni Lopez idi Nobiembre 20 kalpasan a na-cite in contempt gapu iti mapapati nga “undue interference” daytoy iti imbestigasion dagiti mammanday-linteg seknan iti confidential funds ti Office of the Vice President.
Mapapati pay a nangipaay daytoy ti “evasive” a sungbat bayat ti panagsukimat dagiti mammanday-linteg iti nasao a komite.
Itay laeng nabiit, kinuna ni Lopez iti Quad Committee nga awan ti ammona nu kasano a naaramat ti confidential funds ti Office of the Vice President ken inlawlawagna a ti pagrebbenganna ket tapno mang-oversee ti pannakaimplentar ti amin a proyekto ti opisina ti bise presidente.
