Kidkiddawen dagiti kameng ti Makabayan bloc ti pannakaisayangkat ti panagtaripnong kadagiti mangipila ken mangi-endorso iti impeachment complaints kontra kenni Vice President Sara Duterte tapno marugyanen ti proseso.
Iti surat a napetsaan iti Enero sais, kinuna da ACT Teachers party-list Rep. France Castro, Gabriela party-list Rep. Arlene Brosas, ken Kabataan party-list Rep. Raoul Manuel a ti meeting-consultation ket inton Mierkoles, Enero 8 iti Minority Conference Room ti House of Representatives iti oras ti alas otso ti agsapa.
Sigun kadagiti nasao nga opisial, kas advocates para iti good governance ken public accountability, namnamaenda a mapagsasaritaan dagitoy iti panagtaripnong dagiti reklamo nga impeachment kontra kenni Vice President Sara ken agtutunos dagitoy a mangidagadag iti administrasion ni Marcos ken ti liderato ti House of Representatives a maituloy ti impeachment.
Gapu iti dayta, namnamaenda ti sungbat dagiti amin a nangipila ti impeachment complaint ken makipasetda iti panagtaripnong inton Miyerkules.
Maipalagip a kiniddaw ni House Deputy Minority Leader France Castro iti liderato ti House of Representatives nga agtignayen iti tallo nga impeachment complaints a naipila kontra kenni Vice President Duterte.
Ngem agingga iti agdama ket awan pay ti tignay a mapaspasamak ken awan pay ti komento ni House Speaker Martin Romualdez.
