BAGUIO CITY – Nangrugin ti rehabilitasion ti siudad ti Baguio.
Iti panagsarungkar ni Tourism Sec. Bernadette Romulo Puyat ditoy siudad ti Baguio idi kalman, kinunana a nabatad a masapul unayen ti pannakatarimaan ti nagduduma a paset ti siudad.
Inyestoriana a dimmakkel daytoy ditoy siudad ti Baguio isut gapuna a makitana ti dakkel ti nagdumaan ti siudad ti Baguio idi ken ita.
Gapu iti daytoy, kinunana a kabayatan ti development ket adu dagiti aktibidad a maipatungpal kas iti panagmula iti kanayonan a pine trees gapu ta kaaduan kadagiti pine trees ditoy siudad ket natataenganen.
Mangnamnama ni Puyat nga apaman a malpas ti rehabilitasyon ket agbalin manen nga agat pine tree ti siudad, mapukaw dagiti polusion, maksayan ti trapiko ken dumur-as ti panagbiag dagiti residente.
Tarigagay pay ni Puyat nga apaman a malpas ti rehabilitasion ket saan laeng nga agbalin nga It’s More Fun in the Philippines no di ket It’s More Fun FOREVER in the Philippines.
Nangilatang ti gobierno iti P480 million a pondo para iti rehabilitasion ti Baguio City a maaw-awagan met laeng kas City of Pines, Summer Capital of the Philippines ken Creative City.
