Baguio City- Agtultuloy a dumurdur-as ti sports tourism ditoy Baguio City kagiddan iti pammigbig a maiyaw-awed dagiti atleta kadagiti national ken international sports competitions.
Gapu iti daytoy ket impeksa ti Baguio Tourism Council iti panangidaulo ni Gladys Vergara ti suporta nga ipaay dagitoy tapno naan-anay a maital-o ti sports tourism iti City of Pines.
Innayon pay ni Vergara a napateg la unay ti maipapaay dagiti nagduduma a klase ti sports activities, events ken promotion gapu iti panangital-o ken panangisakad iti physical, mental ken emotional wellness wenno pagimbagan dagiti agtutubo.
Impaganetnet pay ti opisyal ti kinapateg iti panakasalwad ken umno a pannakataripato ti physical fitness ti tunggal maysa kagiddan ti panangisuro iti disiplina ken teamwork ti sumaruno a henerasyon.
Mainaig iti, personal a dinar-ayan ken sinuportaran ni BTC chairman Vergara ti Maharlika Martial Arts Center sparring event nga inorganiza ni sigud a MMA legend ken fighter a ni Eric Kelly nu sadino dumanon ti duapulo a fighters ti naglalaban iti nasao a pasalip.
