Pangpanggepen ti gobierno iti Pilipinas ti pannakaiyawid dagiti naarestar a sangapulo ket tallo a Pinay surrogate moms idiay Cambodia iti pagilian.
Maibasar iti report, makikikoordinaren ti Pilipinas iti gobierno sadiay Cambodia para iti pannakaiyawidda kasta metten dagiti agbalin nga annak dagitoy.
Malaksid iti dayta, naamuan metlaeng a nagpasngayen ti dua kadakuada iti uneg ti pagbaludan.
Kinumpirmar daytoy ni Justice Undersecretary Nicholas Felix Ty, bayat a dadduma kadakuada ket ur-urayenda paylaeng ti panagpasngay dagitoy.
Impettengna pay a kambal ti anak ti maysa kadagiti nagpasngay rason a pakabuklan iti sangapulo ket ubbing ti manamnama a maiyawid iti pagilian.
Kabayatanna, innayonna metlaeng a no agpapada ti kapanunutan ti Pilipinas ken Cambodia seknan kadagiti biktima dagus nga asikasuen ti Department of Justice ti pannakaiproseso dagiti papeles dagitoy tapno maiyawid iti Pilipinas.
Malaksid iti dayta, iti kanito a maiyawid dagiti ubbing iti Pilipinas ket mabalin nga i-refer dagitoy iti Department of Social Welfare and Development ken iti National Authority for Child Care.
