Agtultuloy ti pannakapasayaat ti kapasidad ti lokal a gobierno iti siudad ti Baguio iti panagsagana ken panagresponde dagitoy iti aniaman a didigra a sumangbay iti siudad nangruna ita a panawen ti panagtudtudo ken panagbabagyo.
Iti panakiuman ti Bombo Radyo kenni Mayor Benjamin Magalong, kinunana nga agtultuloy ti pannakaipatungpal ti 3 year resiliency program dagitoy iti siudad.
Sigun iti mayor, dua a tawenen ti panangimplementarda iti nasao a programa ngem adda pay ti nabatbati a maysa a tawen tapno mas ad-adda a mapapigsa ti pwersa ti lokal a gobierno para iti kinatalged ken seguridad ti komunidad.
Kinunana nga agtultuloy ti training ken seminars nga ipatpatungpal dagitoy para kadagiti barangay officials kadagiti nagduduma a barangay iti siudad ti Baguio.
Malaksid iti dayta naipasidong metten iti blue alert ti City Disaster Risk Reduction and Management Council (CDRRMC) itay nabiit , daytoy ket kagiddan ti pormal a panangideklara ti ahensya ti Department of Science and Technology – Philippine Atmospheric, Geophysical, and Astronomical Services Administration (DOST-PAGASA) iti panagtutudo.
Nakalerto metten dagiti dadduma pay nga ahensya kas ti Department of Social Welfare and Development, City Healt Services Office, Baguio City Police Office, Bureau of Fire Protection ken dadduma pay.
Kagiddan dayta, impaganetget ti mayor ti kinapateg ti panagsagana nangruna ita a panawen.//Bombo Noveh Organo
