BAGUIO CITY – Kidkiddawen ti maysa a maseknan a residente ti probinsiya ti Mountain Province ti panangisayangkat ti provincial board ti nainget nga imbestigasyon mainaig iti anomalya ti Bontoc General Hospital (BoGH).
Iti surat a naipatulod kenni Vice Governor Francis Tauli, nakalanad iti surat a maatap a ti koleksyon nga aggatad iti P85,000 manipod iti Walk for a Cause donation para kadagiti pasyente ti dialysis a naipaima iti BoGH ket naideposito iti personal a bank account ti maysa a medical officer idi March 12, 2019.
Nakalanad metlaeng iti surat a naapektaran ti ti imahe ti pagagasan iti pananimanehar ti dadaulo ti nasao a pagagasan.
Imbinglay ti maseknan a residente nga adu dagiti anomalya a mapaspasamak iti uneg ti Bontoc General Hospital.
Nupay kasta, kinuna ni Gov. Bonifacio C. Lacwasan, Jr. a nakalukat ti opisinada para iti pannakaipila ti kaso kontra iti opisyal ken mangawat kadagiti reklamo ken pakaseknan dagiti umili tapno maipaayan daytoy iti solusyon babaen iti panangisayangkatda ti forum.
Kagiddan iti daytoy, kinunana nga urayenna laengen ti agbalin a findings ken rekomendasyon ti provincial board seknan iti nasao a banag.
