Mabalballakadan ti publiko a saanda nga ikankano dagiti palso a pablaak maipapan iti pannakasuspindir ti klase gapu iti Habagat (southwest monsoon) ita nga aldaw.
Kasaruno daytoy ti agwarwaras a damag a nasuspindir ti amin a klase ti sumagmamano a lugar iti Pilipinas ita nga aldaw.
Idiay Guiguinto, Bulacan, kinuna ti maysa nga opisial iti publiko a saan a nagtaud kadagiti opisial nga ahensia kas iti Department of Education ken local government units ti pablaak nga impormasion.
Maimatangan a naipost ti maysa nga screenshot iti Facebook page a napauluan iti “Philippines Weather Advisory” a mangibagbaga a nasuspindir ti klase iti sumagmamano a lugar inton Lunes gapu iti saan a nasayaat a paniempo.
Nupay kasta, apaman nga i-click daytoy tapno kitaen ti listaan dagiti lugar a nasuspindir ti klasena ket maiturong ti maysa nga indibidual iti online shopping platform.
Iti sabali a bangir, in-share ti official Facebook page ti munisipyo ti Bacnotan, La Union ti advisory manipud kadagiti Provincial DRRM Offices ti Region 1 a mangibagbaga nga awan ti suspension ti klase para ita nga aldaw kadagiti probinsia ti Ilocos Norte, Ilocos Sur, La Union, ken Pangasinan gapu iti Southwest Monsoon.”
