BAGUIO CITY – Posible a marisut ti parikut ti gobyerno kontra kadagiti colorum a lugan apaman a maaprubaran ken mangrugin iti operasion ti kanayunan a 200 nga yunit ti taxi nga agbiyahe iti rehiyon Cordillera.
Impetteng daytoy ti dadaulo ti maysa a transport sector ditoy Cordillera mainaig iti panakatubngar ti panggep a panakailukat ti kanayonan nga yunit ti taxi ditoy lokalidad.
Iti panakiyuman ti Bombo Radyo Baguio kenni Rey Bacoco ti United Metro Baguio Transport Federation ken Cordillera UV Express Van Federation, kinunana a nailanad iti probisyon ti resolusyon nga impaulog ti Land Transportation Franchising and Regulatory Board (LTFRB)-Cordillera a saan a manayonan dagiti yunit ti taxi nga agbibiahe ditoy lokalidad.
Inyunay-unayna a ti mapasamak ket mapabaruan laeng dagiti nagpaso ken naabandona a prangkisa dagiti taxi.
Kinunana a dumanon iti 195 dagiti yunit ti taxi a saanen a maar-aramat isut gapuna a pinanggep ti LTFRB a pabaruan ken ilukatan iti aplikasyon a dumalan iti kooperatiba wenno korporasion.
Kinuna ni Bacoco a saan a pudno nga agsubsubra ti bilang dagiti taxi nga agbibiyahe ditoy lokalidad gaputa maibasar iti datus ket saan a nadanon ti kasapulan a 5,000 nga yunit ti taxi a nasken nga agbiyahe ditoy lokalidad gaputa iti agdama ket nasurok laeng iti 3,000 a taxi ti agbibiahe iti rehion.
Inlawlawagna pay nga ad-adda a kasapulan ita dagiti pampasahero a lugan nangruna ta manamnama ti panagado dagiti agbalin a pasahero kadagiti masungad a bulan.
