Naireklamo iti La Trinidad Municipal Police Station ti maysa a lalaki gapu iti panangdadaelna iti riprap a paset ti pagtaengan ti kaaruba daytoy.
Ti naireklamo ket addaan iti ligal nga edad, addaan iti asawa, ken residente sadiay Tawang, La Trinidad, Benguet bayat a ti nagreklamo ket kaaruba daytoy a babae nga agtawen iti 49, ken single.
Maibasar iti report ti pulisya, maburiburan ti pamilya ti nagreklamo no anya ti kinasiasino ti indibidual a nangdadael iti riprap iti comfort room (CR) a paset ti balay dagitoy a nangrugi iDi bulan ti Enero ita a tawen.
Sigun iti nagreklamo, namin-ado a daras a napasamak ti nasao a pannakadadael ti riprap iti pagtaengan dagitoy.
Ita a bulan, napag desisyunan ti pamilya ti complainant a tarimaan ti nadadael a riprap tapno maliklikan ti kanayonan a pannakadadael daytoy ken tapno maprotektaran ti septic tank manipud iti posible a pannakadadael daytoy.
Kalpasan ti sumagmamano nga aldaw, natakuatanda a ti mangdadael iti riprap dagitoy ket ti mismo a kaaruba dagitoy.
Idi kinapatang ti complainant ti kaaruba daytoy, impeksa ti lalaki a limmabes ti pagtaengan ti complainant iti boundary ti pagtaenganda.
Kalpasan ti kanayunan a panagrikus ti complainant iti aglawlaw ti pagtaenganda, natakuatanda a sumagmamano a paset ti makinbaba a paset ti pagtaenganda ket nadadael wenno naikkat ti riprap daytoy.
Ti nasao a pannakadadael ti pagtaengan dagitoy ken addaan iti nasurok P15-K a danyos.
