Inlawlawag ni Franklin Smith, Mayor iti Munsipio iti Atok, Benguet nga awan ti parking space ti Atok District hospital isu’t gapuna a drop and Go dagiti lugan sadiay.
Iti interview iti Bombo Radyo kenni Mayor Smith, kinunana a saan a mabalin a maaramat ti gymnasium.
Nupay kasta, manamnama nga agserbi a temporario a parking space ti umuna ken maikadua a kadsaaran ti public market babaen iti impaulog daytoy a resolution.
Sigun kenni Mayor Smith, agipiktibo ti nasao a resolution angingga iti sumaruno a maipablaak a pammilin.
Malaksid iti dayta, manarimaan metlaeng a mailepleppas ti sabali pay a parking slot partikular iti likudan iti munisipio dagitoy.
Maragsakan met ti nasao nga opisial gaputa adda dagiti pribado nga establisiemento nga agpatpatakder kadagiti bukoda a parking slot.
Impanamnama met ti nasao nga opisial nga ipangpangrunada nga iyasideg kenni Benguet Governor Melchor Diclas ti pakaseknanda seknan ti parking slot partikular iti Atok District Hospital.
Impagetget pay ni Mayor Smith a prioridadda dagiti pasiente nga agturong iti ospital ken awan ti ilaklaksid dagitoy nga individual.
Kabayatanna, makidkiddaw iti publiko a direkta a tumawag dagitoy iti linya iti opisinada apaman a makapasar dagitoy iti parikot agsipudta 24/7 a nakatukat ti linya iti komunikasion iti opisina iti nasao a Mayor.//mp4
