Ammo yo kadi kabombo a kaaduan kadagiti indibidual ket maeng-engganyo iti kanito a makakita dagitoy iti parrot wenno nagkakapintas a kita iti bellet?
Ngem idiay Hilario Ascasubi, Argentina agbalbalin met a parikut kadakuada ti kinaadu dagiti parrot nga agtatayab ken agnanaed kadagiti kaykayo, babalay ken kadagiti wire ti kuryente.
Adu kadagiti umili sadiay ti agrekreklamo agsipud ta madadael dagiti wiring ti kuryente dagitoy, kasta metten ti kinaadu dagiti rugit dagitoy iti aglawlaw.
Malaksid iti dayta, saan payen a makarelax ken makaturog dagiti umili gapu ta nariri dagitoy tunggal aldaw ken rabii.
Sigun kadagiti umili sadiay agarup 70,000 ti bilang dagiti parut nga agnanaed iti aglawlawda no sadino agarup sangapulo ket lima kadagitoy ti agnanaed tunggal pagtaengan sadiay.
Immunan metten nga inaksyonan daytoy dagiti otoridad ngem kaskasdi latta nga awan ti nagbanbanaganna agsipud ta karkaro pay nga immadu dagitoy.
Tunggal summer agmigmigrate dagitoy iti dadduma a pagilian ngem kalpasan ti sumagmamano a bulan ket agsubli metlaeng dagitoy ngem ti parikut ket mas pay immadu ti bilang dagitoy.
Kabayatanna, patien met dagiti umili sadiay a nagmigrate dagitoy iti lugarda gapu iti panagadu dagiti pasdek iti siudad rason nga agbiruk dagitoy iti dadduma a lugar a pagtalinaedanda.
